kvi.annáll.is

AnnállEfniHelgisiðirKennslaKirkjaPrédikanirPrívatSálmarYfirlit

« Predikun í Skálholtsdómkirkju 18.september · Heim · Efni fyrir námskeiðsfólk »

Litanía á virkum dögum

Kristján Valur @ 20.47 29/9/05

Stefán Einar, formaður félags guðfræðinema, bað um aðgang að þessari Litaníu á virkum vögum sem beðin var í hádegismessu í dag. Litanía á virkum dögum

Eilifur og almáttugur Guð.

Fyrir kirkju þinni og fyrir þjóðum heims / fyrir góðum og vondum / fyrir réttlátum og óréttlátum / fyrir þeim sem lúta þér í lotningu og fyrir þeim sem ekkert er heilagt, biðjum vér:

Drottinn, miskunna þú oss.

Fyrir kristninni sem vanvirðir boðorð Guðs / brýtur brauðið við sundurskilin borð / lætur ljósin dofna og saltið verða bragðlaust / biðjum vér:

Drottinn, miskunna þú oss

Fyrir hinum voldugu og miklu þessarar jarðar / sem láta þjóðirnar skelfast og eru þó aðeins duft eitt sem aðrir, biðjum vér:

Drottinn, miskunna þú oss

Fyrir hinum ofsóttu / og fyrir þeim sem ofsækja / fyrir hinum píndu / og fyrir þeim sem pína / fyrir öllum sem hæðast að, spotta og lastmæla og fyrir þeim sem verða fyrir áreitni þeirra biðjum vér

Drottinn, miskunna þú oss

Fyrir þeim sem líða hungur og þorsta,/ hungrar eftir brauði, þyrstir í kærleika, þyrstir í frelsi / fyrir heimilislausum og flóttamönnum / fyrir þeim sem tapað hafa virðingu sinni og verið gjörð ærulaus / fyrir þeim sem njóta ekki mannréttinda biðjum vér.

Drottinn, miskunna þú oss

Fyrir öllum þeim sem eru óttaslegin og áhyggjufull / fyrir þeim sem óttast um líf ástvinar / eða sakna látins / fyrir öllum þeim sem sofnuð eru og fyrir oss öllum á hinstu stundu lífs vors biðjum vér

Drottinn, miskunna þú oss

Fyrir hinum ungu í blóma lífs síns / fyrir hinum öldnu sem þroskast til uppskerunnar / fyrir öllum dögum og stundum sem Drottinn gefur oss að vér kunnum að helga honum daga vora og stundir biðjum vér:

Drottinn, miskunna þú oss

Fyrir hinum blindu og mállausu / fyrir öllum fötluðum til líkama og sálar / fyrir öllum eyrðarlausum, vegvilltum og sjúkum á sinni / fyrir öllum sem þarfnast sérstakrar umhyggju og um önnunar og þolinmæði / og fyrir öllum þeim sem annast þau biðjum vér:

Drottinn, miskunna þú oss

Fyrir þeim sem mikið hafa orðið að reyna / fyrir þeim sem lífið er þraut / fyrir þeim sem áttu draum sem ekki rættist og grófu vonir sínar, / fyrir þeim sem eiga þrá en enga von / að þau verði ekki beisk og harðúðug, biðjum vér:

Drottinn, miskunna þú oss

Fyrir hinum sterku / sem hafa stjórn á lífi sínu og ráða örlögum sínum / sem eru heppin og ná árangri / sem eru eitthvað sérstakt / sjálfum sér og öðrum / og fyrir sálu þeirra að hún spillist ekki, biðjum vér

Drottinn, miskunna þú oss

Fyrir öllum þeim sem vinna við flóknar vélar og áhöld / fyrir þeim sem eru á ferðalagi á landi og sjó og í lofti / að óaðgæsla og kæruleysi verði þeim ekki að fjörtjóni, biðjum vér:

Drottinn, miskunna þú oss

Fyrir öllum þeim sem starfa að sömu málum og vér / fyrir öllum þeim sem eru á leið til gleðistunda eða sorgar og eru þó alein, því að enginn hirðir um annan í sjálfselsku sinni, biðjum vér:

Drottinn, miskunna þú oss

Fyrir þessari fögru jörð / og fyrir öllum þeim sem á þessari jörð skaða sig eða aðra / hatast og öfundast / og fyrir ótta alls sem lifir, biðjum vér:

Drottinn, miskunna þú oss

Sjá, söfnuður þinn allur horfir til þín og bíður þín / Þín bíða þau öll sem unna návist þinni / er þú kemur. Lát oss eigi spillast né spilla hvert öðru / heldur hjálpa oss í krafti þínum / með styrkum armi þínum /

Fyrir Drottin vorn Jesú Krist, sem með þér lifir og ríkir í einingu heilags anda frá eilífð til eilífðar.

Amen.

url: http://kvi.annall.is/2005-09-29/20.47.08/

Athugasemdir

Fjöldi 2, nýjasta neðst

Stefán Einar Stefánsson @ 12/11/2005 13.34

Sæll Kristján,

þakka þér fyrir að birta þetta. Þetta er falleg litanía, textinn hreyfir virkilega við manni.

Með kveðju, Stefán

Torfi Stefánsson @ 12/11/2005 16.46

Já þetta eru sterkar bænir!
Svo hvet ég menn að sjá Adams æbler ef ekki er hætt er að sýna þá mynd.
Sterk mynd sem sýnir að það getur borgað sig að rétta ávallt hina kinnina. Þessi bæn passar þar vel:

Fyrir hinum ofsóttu / og fyrir þeim sem ofsækja / fyrir hinum píndu / og fyrir þeim sem pína / fyrir öllum sem hæðast að, spotta og lastmæla og fyrir þeim sem verða fyrir áreitni þeirra biðjum vér

Lokað er fyrir athugasemdir.

© kvi.annáll.is · Færslur · Ummæli